خه‌ڵاتی بیره‌وه‌ریی ئاسترید لینگرێن وه‌ک گه‌وره‌ترین خه‌ڵاتی جیهانیی ئه‌ده‌بی منداڵان، ئه‌مساڵ درایه‌ نووسه‌ری ئۆسترالیایی کتێبی منداڵان، سۆنیا هارتنێت (Sonya Hartnett).  ئه‌و ئێستا له‌ ستۆکهۆڵمه‌.

ـ ”قه‌ت پێم وا نه‌بوو ئه‌و خه‌ڵاته‌ ببه‌مه‌وه‌. بۆیه‌ش به‌ته‌واوی ڕاچڵه‌کام! ئێس ئێم ئێسێکم له‌‌ دایکم نووسی که‌ خه‌ڵاتێکی شه‌شسه‌د هه‌زار دۆلاریم بردۆته‌وه، دۆلاری ئه‌مریکا‌. ته‌له‌فۆنی لێکردم و گوتی پێم وابووه‌ دوو خاڵت به‌ هه‌ڵه‌، به‌ زیاد داناوه‌ و شه‌ش هه‌زار دۆلار بووه‌ گوتم نا نا، شه‌شسه‌د هه‌زاره‌.”

سۆنیا هارتنێت لایه‌نی ڕه‌شی ژیانی له‌ چیرۆکه‌کانی دا بۆ منداڵان ده‌گێڕێته‌وه‌. ئه‌وه‌ش وای لێکردووه‌ ببێته‌ ڕۆماننوسێکی نوێکه‌ره‌وه‌ی ئه‌ده‌بی مێرمنداڵان.

ـ ”ئه‌وه‌ هه‌میشه‌ بۆ من زۆر ڕوون و ئاشکرا بووه‌ که‌ ژیان، به‌ڕاستی تراژیدیایه‌. ئه‌مه‌ زۆر خه‌یاڵییه‌ که‌ مرۆڤ ده‌توانێ بژی به‌ڵام له‌ ماوه‌ی ژیانی دا گه‌لێ شتی تراژیک روو ده‌دا. هه‌ر بۆیه‌شه‌ کتێبه‌کانی من که‌مێک خه‌مناکن. من ده‌مه‌وێ راستییه‌کان بنووسمه‌وه‌ و ژیانیش له‌ ڕاستیدا خه‌مناکه‌.”

سۆنیا هارتنێت یه‌که‌م کتێبی خۆی ٢٥ ساڵ له‌وه‌ پێش بڵاو کرده‌وه‌. ئه‌و کات ته‌مه‌نی ته‌نیا پانزده‌ ساڵ بوو. تا ئێستا هه‌ژده‌ کتێبی نووسیوه‌ و یه‌کێ له‌ هه‌ره‌ به‌ناووده‌نگترینیان منداڵی پێنجشه‌ممه‌یه‌ (Thursday’s child)، که‌ به‌سه‌رهاتی کوڕیژگه‌یه‌ک که‌ خۆی به‌ فه‌رامۆشکراو ده‌زانێ و ده‌ست به‌ لیدانی تونێل و ژیانێکی ژێر زه‌وی ده‌کات.

ـ ”... شتێکی پێبوو له‌ ناو کوته‌ په‌ڕۆیه‌که‌وه‌ پێچرابوو. جاری یه‌که‌م نه‌مانناسییه‌وه‌ به‌ڵام مه‌گه‌ر ده‌یتوانی کێی تر بێت، بێجگه‌‌ له‌ تین. ئێمه‌ لنگ و له‌ته‌ر و قۆڵه‌‌ ڕووته‌که‌یمان دیت، پێسته‌ مۆمئاسا‌که‌ی. قژه‌ ڕه‌نگهه‌ڵه‌که‌ی و نینۆکه‌ تیژ و درێژه‌کانی. سه‌ری هه‌ڵبڕی و ئێمه‌ ده‌موچاوی‌ چرچنی پیاوێکی گه‌وره‌ساڵمان بینی. سیمایه‌ک که‌ به‌ره‌و دنیایه‌کی دی هه‌نگاوی داویشت. دا له‌به‌ر خۆیه‌وه‌ گوتی: خودایه‌ گیان!...”

ـ ”ده‌مه‌وێ خوێنه‌ره‌وه‌کان ئه‌وه‌یان بۆ ده‌رنه‌که‌وێ که‌ به‌ڕاستی ئه‌وه‌ خه‌ریکه‌ چ روو ده‌دات. کاتێ لاپه‌ڕه‌ هه‌ڵده‌ده‌نه‌وه‌، گومانیان لێ په‌یدا بێت.”

ـ به‌ڵام ئاخۆ زارۆک ئه‌و ڕه‌شاییه‌ی پێویسته‌؟

سۆنیا ده‌ڵێ: ”من ئه‌وه‌ی کتێبه‌که‌ پێویستیی پێی هه‌یه‌ ده‌نووسم. ته‌نانه‌ت بێتوو ئه‌و شته‌ بۆ منداڵان گه‌لێک دژوار و ناخۆشیش بێت. کتێبه‌که‌ ده‌بێ ئه‌وه‌نده‌ی بۆم ده‌کرێ تێر و ته‌سه‌ل بێت. ڕێگه‌یه‌کیش بۆ ئه‌وه‌ی وا تێر وته‌سه‌ل بێت ئه‌وه‌یه‌ که‌ وا بنووسی که‌ کتێبه‌که‌ ده‌خوازێ و هه‌ڵده‌گرێ.”

 

 

 

وه‌رگیراو له‌ ماڵپه‌ڕی زایه‌ڵه‌.